پرۆفایلی نەخۆشخانە
نەخۆشخانەی رزگاری فێرکاری گەورەترین نەخۆشخانەی گشتی فێرکاری پارێزگای هەولێرە. کۆی ژمارەی قەرەوێڵەی هەموو بەشەکانی دەگاتە 500 قەرەوێڵە. لەو ژمارەیە (8) دانەیان تایبەتە بە چاودێری چڕ و (27) قەڕەوێڵەی بۆ نەخۆشییەکانی گرێ (ئۆنکۆلۆژی) تەرخانکراوە.
نەخۆشخانە (14) بەشی کلینیکی هەناوی و نەشتەرگەری لەخۆ دەگرێت کە پێکهاتووە لەم بەشانە:
بەشەکانی نەشتەرگەری
- بەشی نەشتەرگەری گشتی
- بەشی نەشتەرگەری گورچیلە و میزەڕۆ
- بەشی نەشتەرگەری رێککاری و جوانکاری
- بەشی نەشتەرگەری قوڕگ و گوێ و لوت
- بەشی نەشتەرگەری و نەخۆشییەکانی چاو
- بەشی ئافرەتان و منداڵبوون
- بەشی نەشتەرگەری روو و شەویلاگ
بەشەکانی هەناوی
- بەشی نەخۆشییەکانی هەناو
- بەشی نەخۆشییەکانی مێشک و دەمار
- بەشی نەخۆشییەکانی پێست
- بەشی رۆماتۆلۆجی و شیاندنەوەی پزیشکی
- سەنتەری هەرس و جگەر
- سەنتەری نەخۆشییەکانی گرێ
- بەشی قەستەرەی دڵ
جگە لەوە (4) بەشی دیکەی پاڵپشت خزمەتگوزاری کلینیکی و فێرکاری پێشکەش دەکەن:
- بەشی تاقیگە
- بەشی تیشکناسی
- بەشی دەرمانخانە
- سەنتەری راهێنانی پزیشکی
ژمارەی پزیشکانی پسپۆڕ لە نەخۆشخانە دەگاتە (200) پزیشک کە سەر بە بواری پسپۆڕی جۆراوجۆرن. نزیکەی (300) پەرستار و (45) دەرمانساز لە نەخۆشخانەی رزگاری کار دەکەن.
بواری فێرکاری بوارێکی زۆر چالاکە لە نەخۆشخانە و نزیکەی (350 - 400) پزیشکی نیشتەجێ لە نەخۆشخانە بوونیان هەیە و زۆربەیان قوتابیانی بۆردن.
نەخۆشخانەی رزگاری فێرکاری چەندین خزمەتگوزاری زۆر پێشکەوتوو پێشکەش دەکات وەک چاندنی گورچیلە، چاندنی گلێنە، چاندنی لولپێچی گوێ، خوێن شوشتن (هیمۆدایالیزە)، هاڕینی بەردی گورچیلە بە شۆکوەیڤ (Lithotripsy) ، چارەسەری گرێ بە تیشک و هتد.
هەروەها چەندین پشکنینی پێشکەوتوو ئەنجام دەدرێن وەک وێنەگری بە زرنگانەوەی موگناتیسی (MRI) و وێنەگری بە سی تی (CT Scan)، مەمۆگرافی و هتد.
تاقیگەی نەخۆشخانە ئامێری هەرە پێشکەوتوو بەکاردەهێنێت بۆ ئەنجامدانی زۆربەی پشکنینەکانی خوێن وەک پشکنینی هۆرمۆن و چاندنی میکرۆبەکان و نەخۆشیزانی شانەکان (Histopathology) و کیمیاگەری بەرگری شانەکان (Immunohistochemistry). ئەمە سەرەڕای هەموو پشکنینە ئاساییەکانی دیکە.
لە پشکنین و چارەسەرە پێشکەوتووەکانی دیکە پێنۆڕییە (نازور - Endoscopy) وەک پێنۆڕی سورێنچک و گەدە و دوازدەگرێ، پێنۆڕی کۆڵۆن، پێنۆڕی سییەکان.
جێگەی ئاماژەپێکردنە کە ئەو دەرمان، پێداویستی، کەرستە و کەلوپەلە پزیشکییانەی نەخۆشخانەکەمان لە کاتی نەشتەرگەری یان هەر خزمەتێکی دیکەی پزیشکیدا بەکاری دەهێنێت کوالیتی هەرە بەرزی هەیە و لە پشکنینەکانی کوالیتی کۆنترۆل دەرچووە و لە کۆمپانیای تۆمارکراو کڕاوە. ئێستا ئەو متمانەیەی کە نەخۆشخانەکەمان لەم رووەوە هەیەتی هیچ نەخۆشخانەیەکی تایبەتیش نییەتی.
بۆ زانیاری تەواو کرتە لەسەر خزمەتگوزارییەکانی نەخۆشخانە بکە.